TU HO DO AU MARSOMBA
Pdt. Kadir Manullang
Get your own playlist at snapdrive.net!
Tuhan, sipatiar na rundut, sipatio na litok, asi rohaM,
O Debata, Situngkol mataniari. Manatap ma Ho sian simanabun
sian ginjang ni langit, tu au sisiak bagi, na hundul dilinggoman,
holom marimpotimpot ala ni dosangki.
Tuhan, tu Ho do au marsomba, dijolo ni langgatan asi rohaM.
O Debata, Ho do na juang dilangit.
Alusi ma au, na todos diari, ulubalang na gogo,
asa sombu uashu, sian aek na tio, sian sampuran holong, napinatupaMi.
Au do tinorjo ni pordangMu, nilonggi ni lilingMu, tu Ho do au marsomba.
Na sala na hubahen nanget huelekhelek diadopanMu Tuhan.
Sai manonggor ma Ho Tuhan, tu au na loja on,
songon galagala sitelluk, telluk mardaguldagul, na sala na hubahen sai sesa ma sude.
Togu sian siruruaon sian rura na rurus, asi rohaM diahu.
Dosangku na hutondong, salpu ma baen na holom songon binsar ni ari.
PadanMu do na hutiop mangapul rohangkon,
taoar sipangumbungumbung, taoar sipangambangambang, sai sahat tu lambungMu, sogot di na sonang.
Lehon, sihingkit, sinalenggam, sai lehon ma na denggan, dison hutomutomu.
Sai songon silumallan tu tano na mahiang, dibaen gok ni dosangku.
Marsomba do au o Tuhan, siteburon hutudung,
asa songon doding ni doding, doding ni simandalasena; pasupasu na uli, mabaor ma i tu au.
Tuhan asi rohaM! Label: Gemende